Таны хүүхэд хичээлээсээ ирэхдээ аль эсвэл тэмдэглэлт баяруудаар эгдүүтэй хөөрхөн гэгч нь зурсан зургаа танд бэлэглэж байсан уу? Баярласнаа илэрхийлж магтаалын үгээр тэднийгээ урамшуулж байгаарай учир нь өнгө ялган будаж сурах нь тэдний боловсролд төдийгүй амьдрах чадварт суралцахад хамгийн чухал үндэс суурь нь болдог юм.

1. Гарын хөгжил болон гарын хүч
Бид өдөр тутамдаа тэмдэглэл хөтлөх, бичих, зурах, хоол хийх, жижиг болон том зүйлсийг зөөх гэх мэт хамгийн их зүйлд булчинг нь ажиллуулдаг эрхтэн бол мэдээж гар билээ. Тэр булчинг багаас нь хөгжүүлэхэд хамгийн чухал үүрэг гүйцэтгэх дасгал бол өнгө өнгийн харандаа ашиглан будах ба энэ нь таны хүүхдийн гарын булчинг хөгжүүлэхээс гадна гарын хүчээ зөв төвлөрүүлэн зурж бичиж сурахад чухал нөлөөтэй байдаг аж.

2. Үзэг болон харандаагаа зөв барихад тусална
Бага насны хүүхдүүдэд бидний хэлж заншсанаар тосон харандаа (crayon)-г эхэлж хэрэглүүлэх нь хамгийн тохиромжтой байдаг ба тэдний бяцхан гарт тохирохуйц өргөн тойрогтой байх тусам булчингийн хөгжлийг сайжруулж, зөв барьж сурахад нөлөөлдөг байна.

3. Бүтээлч сэтгэлгээг хөгжүүлнэ
Хүүхдэдээ өөрийнхөөрөө чөлөөтэй зурж будах боломжийг олгосноор тэдний тархины баруун бөмбөлөг дахь бүтээлч сэтгэлгээ хөгжүүлэх үйл ажиллагааг дэмжиж байдаг. Учир нь өнгө өнгийн дүрсүүд, тэдний төсөөлөн бодсон үлгэрийн ертөнц зэрэг нь яг одоотой ижил бодит төсөөллийг тэдний тархинд бүтээж чаддаг тул нэг ижил зургаа олон дахин давтаж зурж байсан ч тэднийг битгий хориглоорой.

4. Өөрийгөө илэрхийлэх чадварыг нэмэгдүүлнэ
Зурах болон будах үедээ тэд ямагт олон сонголтуудтай тулгарч байдаг. Би юу зурах хэрэгтэй вэ? Томоор уу эсвэл жижгээр үү? Нэг өнгө үү аль эсвэл олон өнгө үү? Аз жаргалтайгаар зурах уу? Эсвэл гунигтай байгаагаар зурах уу? Гэх мэт. Эдгээр олон асуултуудын хариу нь шууд болон шууд бусаар тэдний сэтгэл хөдлөл, дотоод мэдрэмжийг илэрхийлдэг ба зураг зурж, будах нь тэдний хувьд заавал үг ашиглахгүйгээр тэдгээрийг илэрхийлэх хамгийн аюулгүй орчин нь болдог аж.

5. Анхаарал төвлөрлийг нэмэгдүүлнэ
Бидний амжилттай байх эсэх нь нэг зүйл дээр анхаарлаа хэр сайн төвлөрүүлж эхнээс нь дуустал тууштай байх чадвартай шууд хамааралтай байдаг. Тийм ч учраас хүүхдээ бага наснаас нь эхлэн зурж, будах зэрэг анхаарал төвлөрлийг дэмжих дасгалуудыг хийлгэж байх нь хамгийн чухал юм. Тэд зураг зурахдаа ашиглах цаг нь нэмэгдэж байвал энэхүү чадвар ч дагаад мөн нэмэгдэж байгаа гэдэгт битгий эргэлзээрэй.